துப்பாக்கித் தாத்தா வாராரு டோய்...(டுமீல்..டுமீல் பதிவு)

வாங்க மக்கா..இன்னைக்கு எங்க கிராமத்துல வாழ்ந்த ஒரு வெள்ளந்திப் பெரிய மனுசரைப் பத்தின ஒரு பகிர்வு..

துப்பாக்கித் தாத்தாங்கிற பேரைக் கேட்டதும் அவரு ஏதோ மிலிட்டரில வேலை பார்த்தவர்னும், துப்பாக்கி வச்சிருந்தவர்னும் நினைச்சுக்காதீங்க..அதெல்லாம் ஒன்னும் கிடையாது..சாதாரண விவசாயி தான் அவரு..கஷ்டப்பட்டு விவசாயம் செஞ்சு, நிறையப் புள்ளைகளைப் பெத்து எல்லாரையும் கரையேத்துன ரிட்டயர்டு பார்ட்டி தான் அந்தத் தாத்தா..அப்புறம் ஏன் அந்தப் பேருன்னா...

ஒரு நல்லநாளும் அதுவுமா தாத்தா எங்க ஊர்ல இருந்த மாடசாமியண்ணன்கிட்ட ஒரு நல்ல வார்த்தை சொன்னாரு..’உன் மவ தங்கம்யா..இப்படி மவ கிடைக்கக் குடுத்து வச்சிருக்கணும்..குனிஞ்ச தலை நிமிராம நடக்காளே..குடும்பத்துக்கு ஏத்த பொண்ணு’ன்னு தாத்தா சொல்லவும் மாடசாமி ஈன்ற பொழுதிற் பெரிதுவந்த தந்தையாகி, ஊர்ல இருக்குற எல்லார்கிட்டயும் ‘எவ்ளோ பெரிய மனுசன்..அவரே இப்படிச் சொல்லுதாருன்னா எம்புட்டுப் பெருமை’ன்னு தம்பட்டம் அடிச்சிட்டாரு..அன்னைக்கு ராத்திரியே மாடசாமி மவ ஒருத்தன்கூட ஓடிப் போயிருச்சு..ஊரே தாத்தாவைப் பத்தி அப்போ தான் தெரிஞ்சுக்க ஆரம்பிச்சுச்சு..

எங்க ஊரு பக்கம் தீப்பெட்டி ஆபீசு அதிகம்..எங்க மூக்கையா மச்சான் ஒரு கம்பெனிக்கு ஓனரு..அவரு மவன் அப்போ தான் ‘பெரிய மனுசன்’ ஆகி கம்பெனியைப் பார்த்துக்க ஆரம்பிச்சான்..60 கிலோ தாங்குற வெயிட்டையும் வச்சு அசால்ட்டா சைக்கிள்ல பறப்பான்..பொம்பளைப் புள்ளைக எதிர்ல வந்தா கையை விட்டு ஸ்டைலு காட்டுறதும் உண்டு..அவனை ஒரு நா சைக்கிள்ல லோடோட போறதைப் பார்த்த தாத்தா ‘அட..மூக்கையாக்கு இனி கவலை இல்லைய்யா..என்னமா சைக்கிள்ல பறக்கான்’னு சொன்ன அடுத்த நிமிசமே டமார்னு ஒரு சத்தம்..அடுத்த ஒரு மாசத்துக்கு பையன் எந்திரிக்கலை..

அதுக்கு அப்புறம் தான் தாத்தாவுக்கு ‘துப்பாக்கித் தாத்தா’ன்னு அடைமொழி கிடைச்சுச்சு..’தாத்தா பாத்தா சுட்டுடுவாரு டோய்..ஓடு..ஓடு’ன்னு டவுசரைப் பிடிச்சுக்கிட்டு நாங்கள்லாம் அலறியடிச்சு ஓடுவோம்..நாளாக நாளாக தாத்தா அருள்வாக்கு பயங்கரமா பலிக்க ஆரம்பிச்சது..’கொம்பையா மருமவ கனகு அமைதின்னா அமைதி..அப்படியொரு அமைதி..திர்நவேலிக்காரியா இருந்தும் இப்படி இருக்கான்னா ஆச்சரியம் தான்..வாயைத் திறந்து பேச காசு கேட்காளே’ன்னு சொல்லிபுட்டாரு..ஊரே அடுத்து என்ன நடக்கப்போகுதுன்னு ஆவலா எதிர்பார்த்துச்சு..

என் அண்னன் ஒருத்தரு ஊருல பார்ட் டைமா ரவுடி வேலை பார்த்துக்கிட்டு இருந்தாரு.தண்ணியடிச்சுட்டா யார்கிட்டயாவது வம்பிழுத்து நாற வசவு வஞ்சாத்தான் அவருக்கு தூக்கம் வரும். தாத்தா மேட்டர் தெரியாம அன்னைக்கு கனகு புருசன்கிட்டப் போய் வம்பிழுத்துட்டாரு..அம்புட்டுத்தேன்..அருவாவைத் தூக்கிட்டு கனகு மதினி ஓடியாந்துச்சு பாக்கணும்..’ஏலேய்’னு கத்திக்கிட்டே அவனை ஓட ஓட விரட்டி வெட்டுச்சு..அப்புறம் போலீஸ் கேசு ஆயிடுச்சு..’இதுக்கெல்லாம் தாத்தா தான் காரணம்’னு போலீஸ்கிட்டயே கம்ப்ளைண்டு பண்ணுச்சு..அவங்க தலைல அடிச்சுக்கிட்டே போய்ட்டாங்க..

தாத்தாவைப் பார்த்து ஊரே பயந்த நேரத்துல தாத்தாவாலயும் ஒரு பிரயோசனம் இருக்குன்னு கண்டுபிடிச்சாங்க ஊர்ல இருந்த சில சைண்டிஸ்ட்டுக. யாராவது பெருசு ரொம்ப நாளாப் போகாம இழுத்துக்கிட்டு இருந்துச்சுன்னா, தாத்தாவைக் கூட்டிட்டுப் போய்க் காட்டுவாங்க..இவரும் வெள்ளந்தியா நம்மளை மதிச்சுக்கூப்பிடுதாங்களேன்னு போய்ப் பார்ப்பாரு..பார்த்துட்டு ‘இவம் நல்லாத்தாம்யா இருக்காம்..ஒன்னும் பயப்படாதீக..பொழைச்சுக்கிடுவாம்’னு சொல்லிட்டாப் போதும்..அடுத்த ரெண்டு நாள்ல பெருசு பட்டுனு போயிடும். அந்தக் குடும்பமே துப்பாக்கித்தாத்தாவை கையெடுத்துக் கும்பிடும்!

இன்னைக்கு என் மாப்ளகிட்ட ஃபோன்ல பேசும்போது துப்பாக்கித் தாத்தா போன வாரம் டிக்கெட் வாங்கிட்டாருன்னு சொன்னான். ஏன் திடீர்னு இப்படின்னு கேட்டேன். அதுக்கு அவஞ் சொன்ன ஃப்ளாஷ்பேக் தான் இந்தப் பதிவை அவசரமா எழுத வச்சிச்சு..

தாத்தா போன வாரம் மவ வீட்டுக்குப் போயிருந்தாராம். அய்யா வந்திருக்காரேன்னு அவர் மவளும் கோழியடிச்சு சாப்பாடு போட்டிருக்கு. பேரப்புள்ளையோட ஒக்காந்து சாப்பிட்டிருக்காரு. பேரன் சாப்பிடுறதைப் பார்த்துட்டு ‘என்னலே சாப்பிடுதே..பருக்கையை எண்ணிக்கிட்டு ஒக்காந்திருக்கே..நா எப்படிச் சாப்பிடுதேம் பாருலே..சும்மா அள்ளி எறிய வேண்டாம்..நல்லாச் சாப்பிட்டாத்தாம்லே ஒடம்பு திடகாத்திரமா இருக்கும்..இப்போ என்னைப் பாரு..எப்படி இந்த வயசிலயும் தெம்பா இருக்கேன்’ன்னு சொல்லியிருக்காரு..அப்புறம் சாப்பிட்டுட்டு நார்க்கட்டில்ல வேப்பமரத்தடில படுத்தவர் தான்..அப்புறம் எந்திரிக்கவேயில்லை..

என் மாப்ளை கடைசியாச் சொன்னான் ‘துப்பாக்கித் தாத்தா தன்னையே சுட்டுக்கிட்டு சூசைடு பண்ணிக்கிட்டாரு’ன்னு..என்ன அநியாயம்யா!