2011 : சனிப்பெயர்ச்சி பலன்கள் - அறிந்து கொள்ள...

டிஸ்கி : இது சிரிப்புப் பதிவல்ல..சீரியஸ் பதிவு

குருப்பெயர்ச்சி, சனிப்பெயர்ச்சி, தமிழ் புத்தாண்டு, ஆங்கிலப்புத்தாண்டு என சில தினங்கள் வருவதும், உடனே எங்கு பார்த்தாலும் பெயர்ச்சி பலன்களும், புத்தாண்டு பலன்களும் காணக் கிடைப்பதும் வாடிக்கையாகி விட்டது. ஜோதிடம் பற்றி ஒன்றும் தெரியாத கால கட்டத்தில், நண்பர்கள் அதை வாங்கிப் படித்து உணர்ச்சிவசப்படுவதைக் கண்டு கேலி செய்வது என் வழக்கம். அதில் இருக்கும் ஒரு லாஜிக்கல் பிழையை நான் சுட்டிக்காட்டுவதுண்டு.

ஏதாவது ஒரு குரு/சனிப்பெயர்ச்சி பலனைப் பார்த்தால் ’மேஷ ராசிக்காரர்களுக்கு வெளிநாடு செல்லும் வாய்ப்பு கிடைக்கலாம்’ என்று போட்டிருப்பார்கள். அடுத்து புத்தாண்டு பலன் பார்த்தால் ’ரிஷப ராசிக்காரர்களே, பலநாள் கண்டுவந்த வெளிநாட்டுக் கனவு பலிக்கும் காலம் இது’ என்று போட்டிருப்பார்கள். 

இப்படியே ஒரு வருடத்தில் குறைந்தது மூன்று ராசிக்காரர்களை ‘கிளப்பி’விடுவார்கள். இருப்பதோ மொத்தம் 12 ராசிகள். இந்திய ஜனத்தொகை 108கோடி என்று வைத்துக்கொள்வோம். அப்படியென்றால் ஒரு ராசிக்கு 9 கோடிப் பேர். பலன்களின் படி 27 கோடிப்பேர் வெளிநாடு சென்றிருக்க ’வாய்ப்பு’..எனவே குறைந்தது 13 கோடிப் பேராவது வெளிநாடு போவார்கள் என் எதிர்பார்க்கலாமா? இப்படியே தொடர்ந்தால் 9 வருடங்களில் இந்தியாவே காலி ஆகியிருக்க வேண்டுமே? ஏன் ஆகவில்லை? அப்போ, ஏமாற்றுகிறார்களா? - இந்தக் கேள்விகளைக் கேட்டால் நண்பர்கள் ‘ஆரம்பிச்சுட்டான்யா’ என்று சொல்லிவிட்டு ஒதுங்கிக்கொள்வார்கள்.

உண்மையில் ஏன் இந்த ‘பலன்கள்’ சொன்னபடி நடப்பதில்லை? 

ஒருவனுக்கு என்னெல்லாம் கிடைக்க வாய்ப்பு உள்ளது என்பதை முதலில் சொல்வது ஜாதகக் கட்டம். அதில் கிரகங்கள் 12 வீடுகளில் அமர்ந்திருக்கும் அமைப்பினை வைத்து, வெளிநாட்டு வாழ்க்கை உண்டா, இல்லையா என்பதை நல்ல ஜோதிடரால் சொல்லிவிட முடியும். அடுத்து வருவது தசா-புக்தி. ஒவ்வொரு கிரகத்தின் பிடியிலும் மொத்த கட்டமும் குறிப்பிட்ட காலம் இருக்கும். கட்டப்படி அந்த கிரகம் செய்ய வேண்டிய வேலையை, அந்த காலத்தில் செய்து முடிக்கும். 

உதாரணமாக உங்கள் ஜாதகத்தில் ஒன்பதில் குரு இருப்பதாக வைத்துக்கொள்வோம். அது வெளிநாட்டு யோகத்தை கொடுக்க வாய்ப்பு உண்டு. அது எப்போது நடந்தேறும் என்றால் குரு வின் தசா/புக்தியில் நடக்கும். அதாவது விதிக்கப்பட்டதை நடத்தி வைக்க, குறிப்பிட்ட கிரகம் உதவும். கட்டமும், தசா/புக்தியுமே அடிப்படை. உங்களுக்கு கட்டப்படியும் வெளிநாட்டு யோகம் இருந்து, அதற்கு காரணகர்த்தாவான கிரகத்தின் தசா/புத்தி நடந்ததென்றால், 75% சக்ஸஸ் தான். அப்போ மீதி? அந்த மீதியே இந்த ‘பெயர்ச்சி’ பலன்கள் சொல்வது. இன்றைய தேதியில் ஒரு கிரகம் (சனி/குரு) இருக்கும் இடத்தினை வைத்து சொல்லும் கிரகாச்சாரமே இந்த பெயர்ச்சி/புத்தாண்டு/ராசி பலன்கள்.

எனவே கட்டமும் ஆஃப் ஆகி, தசா/புக்தியும் ’ஆப்பு’ ஆகியிருந்தால், இந்த 25%-ஆல் ஒரு பிரயோஜனமும் கிடையாது. எனவே இந்த ‘பெயர்ச்சி’ பலன்களை மட்டுமே படித்துவிட்டு ஆனந்தக் கூத்தாடுவதையோ, தலையில் துண்டைப்போட்டு அழுவதையோ விட்டுத் தள்ளுங்கள். இந்தப் பெயர்ச்சிப்படி கெட்ட நேரம் என்றாலும், அதை உறுதிப்படுத்த வேண்டியது கட்டமும், தசா/புக்தி நாதனும் தான்.

இப்போது விஷயத்திற்கு வருவோம். திருக்கணிதப்படி, வருகின்ற நவம்பர் ஒன்றாம் தேதி சனி பகவான் கன்னி ராசியில் இருந்து துலாம் ராசிக்கு நகர்கிறார். இந்த இடநகர்வே, இப்போது சனிப்பெயர்ச்சி என பரபரப்பாக பேசப்படுகிறது. பொதுவாக சனி பகவான் தான் இருக்கும் ராசியையும், அதற்கு முந்தைய, பிந்தைய ராசியையும் நன்றாக ‘கவனிப்பார்’. 

எனவே இந்த பெயர்ச்சியானது கன்னி-துலாம்-விருச்சிகம் ஆகிய மூவருக்கும் ஏழரைச்சனியை கொண்டுவருகிறது. (கன்னி-துலாம் ஏற்கனவே 7 1/2ல் தான்..). அதென்ன 7 1/2? அண்ணன் சனி பகவான் ஒரு ராசியில் 2 1/2 வருடங்கள் இருப்பார். இப்போது துலாமை எடுத்துக்கொண்டால் கன்னியில் இருக்கும்போதே அதற்கு சனியின் பாதிப்பு ஆரம்பித்துவிட்டது. இப்போது துலாமிற்கு சனி வருவதால் அடுத்த 2 1/2 வருடங்களுக்கு 7 1/2ன் பாதிப்பு தான். அடுத்து விருச்சிகத்திற்கு போகும்போதும் சனியின் பாதிப்பாக கடைசி 2 1/2 வருடங்களுக்கு இருக்கும். மொத்ததில் 7 1/2 வருடங்கள் சனியின் கருணை நமக்குண்டு!

எனவே இந்த பெயர்ச்சியைப் பற்றி எல்லோரும் பதறிப் புலம்ப வேண்டிய அவசியம் இல்லை. 71/2 சனியின் ஆதிக்கத்தில் உள்ள கன்னி-துலாம்-விருச்சிக ராசிக்காரர்களும் அஷ்டமச்சனியை எதிர்கொள்ளப்போகும் மீன ராசிக்காரர்களும், கண்ட சனியை எதிர்கொள்ளப்போகும் மேஷ ராசிக்காரர்களும் மட்டும் இதைப் பற்றி கவலைப்பட்டால், போதுமானது. மற்றவர்கள் சும்மா பார்த்து வைத்துக்கொண்டாலே போதும். (சிம்ம ராசிக்காரர்களுக்கு 7 1/2 முடிவதால், அவர்கள் தேடித் தேடி சனிப்பெயர்ச்சி பலன்களைப் படித்து சந்தோசப்படவும்!) 

இந்த 5 ராசிக்காரர்களும் ’சனியா?’ என்று அலற வேண்டாம். ஏற்கனவே சொன்னபடி, உங்கள் ஜாதகக் கட்டமும், தற்போதைய தசா/புக்தியும் நன்றாக இருந்தால், பெரிய அளவில் பாதிப்பு இருக்காது. ஊமை அடியாக விழலாம். எனவே பத்திரிக்கைகளில் வரும் பலன்களைப் படித்துவிட்டு டென்சன் ஆகாமல், நீங்கள் செய்ய வேண்டியதெல்லாம், ஒரு நல்ல ஜோதிடரிடம் உங்கள் ஜாதகத்தைக் கொடுத்து சரியான அறிவுரையை பெற்றுக்கொள்ளுங்கள். 7 1/2 வருடங்களுக்கு ஒன்றுமே செய்யாமல் நாம் சும்மா இருந்துவிட முடியாது. எனவே சிக்கலில் மாட்டாமல், வாழ்க்கையை ஓட்ட என்ன செய்யவேண்டும் என தெளிவாகக் கேட்டுக்கொண்டு, அதைக் கடைப்பிடித்து வாருங்கள். 

பொதுவாக இக்காலத்தில் ஆஞ்சநேயர் வழிபாடு நன்மை பயக்கும்.

வாழ்க வளமுடன்!