I-T ACT SECTION 66 A - நமது கவலைகளும், கோரிக்கைகளும்.

”வதேராவை விடவும் கார்த்தி சிதம்பரம் அதிக சொத்து சேர்த்திருப்பதாக செய்திகள் வருகின்றன”- என்ற இந்த ஒற்றை வரிக்காக ரவி ஸ்ரீனிவாசன் எனும் ட்வீட்டர் கார்த்தி சிதம்பரம் கொடுத்த புகாரின் பேரில் கைது செய்யப்பட்டிருக்கிறார். I-T ACT SECTION 66 A-ன்படி இந்த நடவடிக்கை எடுக்கப்பட்டிருப்பதாகத் தெரிகிறது. 

இந்திய அரசியலமைப்புச் சட்டம் நமக்களிக்கும் பேச்சுச் சுதந்திரத்தை பறிப்பதாக உள்ள இந்த சட்டப்பிரிவை மத்திய அரசு மறுபரிசீலனை செய்ய வேண்டியது அவசியம். இல்லையென்றால் சினிமா விமர்சனம் முதல் சகபதிவர் மீதான கிண்டல்வரை அனைத்துக் காரணங்களுக்காகவும் ப்ளாக்/ஃபேஸ்புக்/ட்வீட்டர் பயனாளிகள் அனைவருமே உள்ளே போகும் வாய்ப்பு அதிகம்.

எனவே நமது இணைய சுதந்திரத்தைக் காக்க, ஐயா.தருமி அவர்கள் முன்னெடுத்திருக்கும் இந்த நல்ல முயற்சியை ஆதரிப்பது நம் கடமை. மேலும், இந்தப் பதிவின் மையக் கருத்தினை, ஒரு சட்ட மனுவாக அல்லது பொது நல வழக்காக நீதிமன்றத்திற்கும் எடுத்துச் செல்வது அவசியம். இந்த விஷயத்தின் மேல் அக்கறையுள்ள வழக்கறிஞர்கள், ஐயா.தருமியைத் தொடர்பு கொள்ளவும்.

-----------------
 I-T ACT SECTION 66 A பற்றி ப்ரனேஷ் ப்ரகாஷ், (Pranesh Prakash, Policy Director of the Bangalore based Centre for Internet and Society)கூறுவது வேடிக்கையாகவும், வேதனையாகவும் இருக்கிறது.(http://www.thehindu.com/news/national/iac-volunteer-tweets-himself-into-trouble-faces-three-years-in-jail/article4051769.ece) அவர் சொல்கிறார்: ’யாரும் என்னைப் பற்றி ஒரு புத்தகம் எழுதி, அதில் என்னை வேண்டுமென்றே மோசமாக எழுதினாலும் என்னால் அதைப் பெரிதாக ஒன்றும் சட்டப்படி செய்ய முடியாது. ஆனால் அப்படி ஒரு செய்தியை e-mail செய்தாலும் உங்களுக்கு மூன்றாண்டுகள் ஜெயில் நிச்சயம்! இது தவறாக யாரையும் கொன்றுவிட்டால் கிடைக்கும் இரண்டாண்டு சிறைத் தண்டனையை விட அதிகம்!’

”ரவி (சீனிவாசன்) மேல் கார்த்திக் சிதம்பரம் கொடுத்த புகாரின் பேரில், நீதிமன்றங்கள் அவரைத் தண்டிக்காதவரை அவரைக் கைது செய்தது தவறு” என்று இன்று இந்து தினசரியில் (5.11.12 - http://www.thehindu.com/todays-paper/advani-condemns-arrest-of-iac-activist/article4065734.ece) அத்வானி கூறியுள்ளார்.

இந்துவில் வந்த தலையங்கமும் (http://www.thehindu.com/opinion/editorial/an-attack-on-media-freedom/article4055267.ece) இக்கருத்தைப் பற்றியும், பேச்சு சுதந்திரத்தைப் பற்றியும் தெளிவாக வலியுறுத்தியுள்ளது.

*இவ்வாறு செய்தித் தாட்களில் வந்த செய்திகளை நம் பதிவுகளில் மேற்கோளிடுவதும் கூட இச்சட்டத்தினால் தவறாகக் கருத்தப்படும் என்ற நிலையே இப்போது உள்ளது. இது தனி மனித உரிமைகளையே பறிக்கும். நம் கருத்துக்களை சுதந்திரமாக வெளியிடும் உரிமை நமக்கு வேண்டும். இந்த உரிமை நம்மிடம் இருக்குமளவிற்கு I-T ACT திருத்தப்பட வேண்டும்.

*இதனோடு, பிரபலங்கள் கொடுக்கும் வழக்குகளுக்கு முன்னுரிமை கொடுக்கும் காவல் துறையின் அவசரப் போக்கும் நமக்கு தேவையில்லாத அச்சத்தை மட்டுமே தரும். சரியான விசாரணை வேண்டும்; தேவையற்ற கைது தவிர்க்கப்பட வேண்டும் என்பவைகளைக் காவல் துறையின் கவனத்திற்குக் கொண்டு செல்கிறோம்.

*முறையான விசாரணை மூலம் உண்மைகள் வெளிவரும் முன்பே வெகு கோரமான ஊடகச் செய்திகள் குற்றமற்றவர்களையும் பாதிக்கும் என்ற எண்ணம் ஊடகங்களிடம் இல்லை என்பதும் வேதனையான செய்தி. ஊடகங்கள் இன்னும் பொறுப்போடு செயல்பட வேண்டும்.

நம் உரிமையையும், சுதந்திரத்தையும் காப்போம்.
இதற்காக பதிவர்கள் ஒன்று படுவோம்.

-----------------------
தொடர்ந்து 2 நாட்கள் கீழே உள்ள வரியை எல்லோரும் டிவிட்டரிலும் பேஸ் புக்கிலும் பதிவிடலாமே :

இந்திய அரசே,
தனிமனித உரிமைகளையே பறிக்கும். I-T ACT Section 66 A திருத்தப்பட வேண்டும். தனிமனித கருத்துக்களை சுதந்திரமாக வெளியிடும் உரிமை வேண்டும்.