Tuesday, June 30, 2015

திரைக்கதை சூத்திரங்கள் - II - பகுதி 46


ஜெனர் - கேங்ஸ்டர் (Gangster)

அட்வென்ச்சர் ஜெனரில் ரவுடிகளைப் பந்தாடும் போலீஸ் ஹீரோக்கள் பற்றிப் பார்த்தோம், இல்லையா? இந்த கேங்ஸ்டர் ஜெனர் என்பது அதற்கு எதிர்ப்புறத்தில் நின்று பார்ப்பதைப் போன்றது. வெறுமனே ரவுடி, வில்லன் என்று கடந்து போய்விடாமல், அவர்களின் வாழ்க்கையை ஆராய்வது அல்லது பதிவு செய்வது இந்த கேங்ஸ்டர் படங்கள். இவ்வகைப் படங்களின் திரைக்கதையில் இருக்க வேண்டிய அம்சங்களைப் பார்க்கும் முன்பு, தமிழ் சினிமாவில் வந்துள்ள கேங்ஸ்டர் படங்களைப் பற்றி சுருக்கமாகப் பார்த்துவிடுவோம்.

தமிழில் கேங்ஸ்டர் படம் என்றதும் நம் நினைவுக்கு வருவது நாயகன் தான். எப்படி ஆங்கிலத்தில் காட் ஃபாதர் படம் ஒரு மாஸ்டர்பீஸோ, அப்படித்தான் தமிழில் நாயகன். நாயகன் படத்தில் உள்ள அம்சங்கள், ஒரு நல்ல கேங்ஸ்டர் படத்தில் இருந்தே தீரும். பொதுவாக தமிழில் வந்த கேங்ஸ்டர் படங்களை மூன்றாகப் பிரிக்கலாம்.

 1.நான் தான்டா தாதா:

ஒரு தாதாவின் எழுச்சியையும் வீழ்ச்சியையும் பற்றிப் பேசுபவை இவ்வகைப் படங்கள். ஜீரோவில் இருந்த ஹீரோ, எப்படி மேலெழுந்து வந்தான், இறுதியில் எப்படி வீழ்ந்தான் என்று ஒரு வாழ்க்கை வரலாற்றுப் படம் போல் உருவாக்கப்படுபவை இவ்வகை. நாயகன், புதுப்பேட்டை, ஆரண்ய காண்டம், தளபதி, அமரன் போன்றவை இவ்வகைப் படங்களுக்கு சிறந்த உதாரணங்கள். வறுமையும் குற்றமும் நிறைந்த பிண்ணனியில் இருந்து வரும் ஒரு ஹீரோ, எப்படி இந்த நவீன சமூகத்தை வெற்றிகொள்கிறான் என்பதே இவ்வகைப் படங்களின் கதைப் பொருள். ஹாலிவுட்/உலக சினிமாக்களின் தாக்கம் இவ்வகைப் படங்களில் இருக்கும்.

இதைத் தவிர்த்து, தமிழுக்கென்றே ஒரு சிறப்புவகை கேங்ஸ்டர் படங்கள் உண்டு. அதற்கு மிகச் சிறந்த உதாரணம், சீவலப்பேரி பாண்டி. இந்த மண்ணின் கதையில் இருந்து உருவான வகை இது. மலையூர் மம்பட்டியான், சீவலப்பேரி பாண்டி, அருவா வேலு என ராஃபின் ஹூட் கதைப்பாணியில் உருவான படங்கள் இவை. ஆனால் இவை அனைத்துமே உண்மைக்கதைகள் என்பது தான் வேடிக்கை. ஹாரிஸ் ஜெயராஜ் மாதிரி, கடவுள் தன்னைத் தானே காப்பி அடித்து எழுதிக்கொண்ட கதைகள் என்றும் சொல்லலாம்!! இந்த ஹீரோக்களின் பொது அம்சம், வன்முறையின் பாதையில் இறங்கி, முடிவில் வன்முறைக்கே பலியாவது. ஹீரோ விரும்பாமலே தாதா ஆகும் கதை என்றாலும், சுப்பிரமணியபுரம் படம் இவ்வகையில் ஒரு கிளாசிக்.

2. நான் தாதா அல்ல :


இவ்வகைப் படங்கள் தாதாக்கள்/ரவுடிகளின் வாழ்க்கையைப் பேசினாலும், ஏதோவொரு காரணத்திற்காக தாதா வாழ்க்கை வேண்டாம் என்று உதறிச் செல்லப் போராடும் ஹீரோவைப் பற்றிப் பேசுபவை. பாட்ஷா இதற்கு மிகச்சிறந்த உதாரணம்.

தாதாவாக பெயர் பெற்ற ஒருவன், குடும்பம்/காதல் போன்ற ஏதோவொரு காரணத்திற்காக தாதா வாழ்க்கையில் இருந்து வெளியேற விரும்புகிறான். ஆனாலும் பழைய வாழ்க்கை அவனை விடுவதில்லை. இதில் எப்படி ஜெயித்தான்/தோற்றான் என்பதே இவ்வகைப் படங்களின் கதைப் பொருள். பாட்ஷாவிற்கு அடுத்து இவ்வகைப் படங்களுக்கு நல்ல உதாரணம், தலைநகரம். அருமையாக ஒரு திருந்திய தாதாவின் வாழ்க்கையை சித்தரித்த படம் அது. இதையடுத்து, ட்ரெண்ட் செட்டராக அமைந்த அமர்க்களம். ‘ரவுடியைக் காதலிக்கும் ஹீரோயின்’ எனும் இந்த ஒன்லைனை வைத்துக்கொண்டு அப்போது ஏகப்பட்ட படங்கள் வெளியாகின. இன்றைய பேய்க் காமெடிப் படங்கள் போன்று, அப்போது இவ்வகைப் படங்கள் தமிழ் சினிமாவைக் கலக்கின. ஜெமினி இன்னொரு கமர்சியல் படத்திற்கான நல்ல உதாரணம். இவற்றை ரொமாண்டிக் கேங்ஸ்டர் படம் என்றும் வகைப்படுத்தலாம்.

முந்தைய வகையைப் போன்று இல்லாமல், ஜாலியாக இவ்வகைப் படங்களில் கதை சொல்லப்பட்டதும் கமர்சியல் வெற்றிக்கு ஒரு காரணம். பாட்ஷாவின் திரைக்கதையமைப்பில் பகவதி, தோரணை, அரசு என பல படங்கள் வந்தன.

 3. தாதாவைச் சுற்றி..:

ஒரு தாதாவின் வாழ்க்கையைப் பற்றிப் பேசாமல், தாதாவின் இருப்பை கதைக்களமாக வைத்து பின்னப்படுபவை இவ்வகைக் கதைகள். நந்தா, ரன், சித்திரம் பேசுதடி போன்றவை இதற்கு உதாரணங்கள். பி ஸ்டோரியாகவோ அல்லது கதைக்களமாகவோ மட்டுமே இங்கே தாதா கதை இருக்கும். ஹீரோ பெரும்பாலும் சம்பந்தபட்ட ஒருவன் அல்லது ஹீரோ பெரும்பாலும் அடியாள். தாதாவிற்கும் ஹீரோவுக்குமான உறவு தான் இங்கே முக்கியம். தளபதியை இவ்வகையில் சேர்க்கலாம் என்றாலும், அர்விந்தசாமி கேரக்டரின் காரணமாகவே அது முதல்வகையில் சேர்கிறது. போக்கிரி போன்ற அட்வென்ச்சர் படங்களை இவ்வகை கேங்ஸ்டர் படங்களின் கலவை என்று சொல்லலாம்.

உலக சினிமாக்களில் பரிச்சயம் உள்ளவர்களுக்கு, ஒரு கேங்ஸ்டர் கதையை/திரைக்கதையை எழுத வேண்டும் எனும் கனவு இருந்தே தீரும். திரைக்கதையாசிரியர்களுக்கு மட்டுமல்லாது ஹீரோக்களுக்கும் கேங்ஸ்டர் படம் என்பது ஒரு லட்சியமாக இருப்பதையும் நாம் காண முடிகிறது. இப்போது கேங்ஸ்டர் திரைக்கதையில் இருக்கும் சில பொதுவான அம்சங்களைப் பார்ப்போம். முதல்வகை தான் உண்மையான, சுத்தமான கேங்ஸ்டர் கதை என்பதால், அவற்றையே நாம் அளவுகோலாகக் கொள்ள வேண்டும். எனவே மேலே சொன்ன மற்ற இரண்டு வகைகளைப் பொறுத்து, இந்த அம்சங்கள் மாறுபடும் என்பதையும் கவனத்தில் கொள்ளவும்.

கேங்ஸ்டர் மூவீஸ்:

அதிகாரத்திற்கான போர் நடக்கும் கதைக்களமே கேங்ஸ்டர் மூவீஸ் என்று சொல்லலாம். உடலபலம், அதிகார பலம், பண பலம் மூன்றும் இங்கே முக்கியப் பங்கு வகிக்கும். நாயகன் போன்று ஒரு தனி மனிதனின் வாழ்க்கையை சித்தரிப்பதாகவோ அல்லது புதுப்பேட்டை போன்று ஒரு தனிமனிதனின் வாழ்க்கையின் ஊடாக ஒரு சமூகத்தை சித்தரிப்பதாகவோ இவ்வகைப் படங்கள் இருக்கும். நேர்வழியில் போக விரும்பாத அல்லது போக முடியாத ஒருவன், குறுக்கு வழிகளில் அடையும் வளர்ச்சியும் வீழ்ச்சியும் இதில் அலசப்படும்.


ஹீரோ:

ஒரு ஜீரோ எப்படி ஹீரோ ஆகிறான் என்பதே ஹீரோ கேரக்டரைசேசனின் அடிநாதம். எனவே வலுவான குணச்சித்திர வளைவு இங்கே உருவாக்கப்பட வேண்டும். ஹீரோ வேறு எங்கிருந்தோ குடிபெயர்ந்து வந்தவன், அதிகார வேட்கை கொண்டவன், நியாய தர்மங்கள் பற்றிக் கவலைப்படாதவன், எதிரிகளைக் கொல்லவும் அஞ்சாதவன், தன் மக்களுக்கு மட்டுமே நியாயமாக நடப்பவன் என்பது பொதுவான ஹீரோ கேரக்டரைசேசன்.

குறிக்கோள்:

மேலே சொன்னபடி அதிகார வேட்கையும் தனக்கென ஒரு அடையாளத்தை உருவாக்கிக்கொள்வதும் தான் ஹிரோவின் குறிக்கோளாக இருக்கும். பி ஸ்டோரியில் வரும் காதல்கூட ஹீரோவுக்கு முக்கியம் கிடையாது. அது முக்கியம் என்று அவன் நினைக்க ஆரம்பிக்கும்போது, அவன் வீழ்ச்சி ஆரம்பிக்கும். ‘ஒருத்தனை திருந்த விடுறாங்களா..பாவம்’ எனும் செண்டிமெண்ட் டச் உத்தரவாதம்!

வில்லன்:

இந்த சமூகம் தான் கேங்ஸ்டர் படங்களின் மெயின் வில்லன். சமூகம் உருவாக்கி வைத்திருக்கும் ஏற்றத்தாழ்வுகள், அடிமட்டத்தில் இருக்கும் ஒருவன் மேலே எழும்போது சந்திக்கும் சவால்கள், எதிர்கொள்ள வேண்டியிருக்கும் பணபலம்/அதிகார பலம்/வன்முறை போன்றவை மெயின் வில்லன்கள். கூடவே சட்டமும் போலீஸும் முக்கிய வில்லன்களாக வலம் வரும். பொதுவாக, கேங்ஸ்டர் படங்களில் கெட்ட போலீஸ் மட்டுமே படைக்கப்படும். ஹீரோ திருந்த வேண்டும் என்றால் மட்டுமே, நல்ல போலீஸ் கேரக்டர் இருக்கும். அந்த கேரக்டர் Joseph Campbell  சொன்ன வழிகாட்டி கேரக்டராக இருக்கும். Blake Snyder சொன்னபடி, அந்த நல்ல போலீஸ்கார் ஆல் இஸ் லாஸ்ட்டில் சாகவும் வாய்ப்பு 90% உண்டு. இன்னொரு முக்கிய விஷயம், ஹீரோ தாதாக்களால் கொல்லப்படும் நல்ல போலீஸ்களைப் பற்றி....உஷ்!

திரைக்கதை:


இது ஆண்களின் உலகம். (நாங்களும் தாதா தான் எனும் பெண்ணியவாதிகள் மன்னிக்கவும்!). லேடீஸ் கேரக்டர்களுக்கு இங்கே முக்கியத்துவம் மிகவும் குறைவு. அதாவது அவர்களுக்கென்று குணச்சித்திர வளைவு ஏதும் இருக்காது. சிட்டி மற்றும் சேரிப்பகுதியும் இருட்டும் தான் கதை நடக்கும் இடம். நவீன சமூகத்தில் முன்னேறுவதற்கு, ஒரு அடித்தட்டு மனிதன் எப்படிப் போராடுகிறான் என்று சொல்ல, நகரம் தான் சிறந்த இடம். பின்னால் நிற்கும் ரவுடிகளின் எண்ணிக்கை, கார்கள், துப்பாக்கிகள், வெடிகுண்டுகள் போன்றவை தாதாவைச் சுற்றி நிரம்பி வழிவது வழக்கம்.

ஹீரோவின் பிறப்பில் ஆரம்பிக்கும் கதை, அவன் சந்திக்கும் அவமானங்களையும் கஷ்டங்களையும் செட்டப்பில் சொல்லி முடிக்கும். பின்னர் ஹீரோ தாதா உலகில் நுழைந்து தற்காலிக வெற்றியில், பெரிய தாதாவாக ஆவதில் மிட் பாயிண்ட் வரும். அங்கேயிருந்து ஹீரோவின் வீழ்ச்சி ஆரம்பிக்கும். இறுதியில் தோல்வியா அல்லது மீண்டும் வெற்றியா என்பது, கதையின் கருவைப் பொறுத்து அமையும்.

(தொடரும்)
 
மேலும் வாசிக்க... "திரைக்கதை சூத்திரங்கள் - II - பகுதி 46"
மறுமொழிப்பெட்டி:
தமிழிலும் மறுமொழியிடலாம்
Loading...

2 comments:

Post a Comment

தங்கள் பின்னூட்டத்திற்கு நன்றி.

Sunday, June 28, 2015

ஹிட்ச்காக் படத்தைச் சுடுவது எப்படி? - Flightplan(2005)

David Fincher என் மனம் கவர்ந்த இயக்குநர். அவர் இயக்கிய Panic Room பார்த்து அசந்துபோனேன். அதிலும் ஹிரோயின் Jodie Foster-ன் நடிப்பு(ம்!!) என்னை கவர்ந்துவிட, அவர் நடித்த மற்ற படங்களைத் தேடியபோது கிடைத்தது தான் இந்த Flightplan. படத்தின் ஒன்லைனைப் படித்ததும் ஆச்சரியம் தாங்கவில்லை. நீங்களும் படியுங்கள்:

ஹீரோயின் தன் ஆறு வயது மகளுடன் ஃப்ளைட்டில் ஜெர்மனிய்ல் இருந்து அமெரிக்காவிற்கு பயணிக்கிறார். பாதி வழியில் ஃப்ளைட்டில் அவரது மகள் தொலைந்து போகிறாள். அங்கே பயணிக்கும் அனைவருமே ஹீரோயினுடன் யாரும் வரவில்லை' என்று சாதிக்கிறார்கள். எங்கே அந்தக் குழந்தை, ஏன் எல்லோரும் அப்படிச் சொல்கிறார்கள், அவர்கள் சொல்வது உண்மையா?
நமது ஹிட்ச்காக் தொடரில் வந்த The Lady Vanishes (1938) கட்டுரையைப் படித்தவர்களுக்குப் புரிந்திருக்கும், இரண்டு படத்தின் கதையும் ஒன்று தான் என்று. 

ஹீரோயின் ட்ரெய்னில் தனியே பயணிக்கிறார். அங்கே அறிமுகம் ஆகும் ஒரு லேடி, திடீரெனக் காணாமல் போகிறார். ஆனால் அப்படி ஒரு லேடியே பயணிக்கவில்லை, எல்லாம் ஹீரோயினின் கற்பனை என்று எல்லாப் பயணிகளும் சொல்கிறார்கள். ஹீரோ உதவியுடன், ஹீரோயின் உண்மையைக் கண்டுபிடிக்கிறார் - என்பதே ஹிட்ச்காக் படத்தின் ஒன்லைன்.


இணையத்தில் தேடியதில், எங்கேயுமே The Lady Vanishes படத்தின் ரீமேக் என்றோ, இன்ஸ்பிரேசன் என்றோகூட படக்குழு வெளிப்படையாக ஒத்துக்கொள்ளவில்லை. (நமது ஆட்கள் பாஷையில் இது காப்பி!). பிறகு படத்தைப் பார்த்தேன். ஒன்றரைமணி நேரம் நம்மை கட்டிப்போடும் அட்டகாசமான த்ரில்லர் என்பதை நாம் ஒத்துக்கொள்ளத்தான் வேண்டும்.

தாராளமாக ஒருமுறை பார்க்கலாம். படம் பார்க்காதவர்கள் மேலே படிக்காமல், படத்தை இங்கே டவுன்லோடு செய்து பார்க்கவும்:

 https://kat.cr/flightplan-2005-dvdrip-eng-axxo-t215409.html#main

(சப்-டைட்டில் லின்க், கமெண்ட்ஸ் செக்சனுக்குள் இருக்கிறது.)

----------------------------------------------------------------------------------------------------------------------------------------------



இப்போது The Lady Vanishes எப்படி திறமையாக Flightplan குழுவினரால் சுடப்பட்டிருக்கிறது என்று பார்ப்போம். (No offense..It's a good learning!!). படத்தின் முக்கியக்கூறுகளில் இரண்டு படங்களுக்கும் இடையிலான ஒற்றுமை, வேற்றுமைகளை இப்போது பார்ப்போம்.

ஜெனர் :

The Lady Vanishes படம், ஒரு ரொமாண்டிக்கல் காமெடி த்ரில்லர் என்று சொல்லலாம். படம் முழுக்க ஒரு கேஷுவல்னெஸ் இருந்துகொண்டே இருக்கும். லேடி காணாமல்போனது சஸ்பென்ஸைக் கூட்டுமே ஒழிய, நம் கவலையைக்க்கூட்டாது.

Flightplan படம் ஒரு சைக்காலஜிக்கல் சஸ்பென்ஸ் த்ரில்லர். குழந்தை காணாமல் போவது என்பது காமெடியான விஷயம் இல்லை. கூடவே ஹீரோயினின் சைக்காலஜி பிரச்சினையும் சேர்ந்துகொள்ள, ஒரு மிஸ்ட்ரி எஃபக்ட் வந்துவிடுகிறது.

ஹீரோயின்:

ஹிட்ச்காக் படத்து ஹீரோயின், ஒரு பணக்காரனுடன் நிச்சயம் ஆனவள். திருமணத்தை நோக்கி, தனியே டிராவல் செய்கிறாள். வழியில் ஹீரோவிடம் மனதைப் பறிகொடுக்கிறாள். இறுதியில் லேடியைக் கண்டுபிடித்தபின், ஹீரோவுடன் சேர்கிறாள்.

Flightplan படத்தில் அப்படியே உல்டா. அவள் கணவன் சிலநாட்களுக்கு முன்பு தான் இறந்திருக்கிறான். அவனின் இறுதிச்சடங்கை அமெரிக்காவில் செய்ய, குழந்தையுடன் பயணிக்கிறாள். குழந்தை காணாமல் போகிறது. இறுதியில் குழந்தையுடன் சேர்கிறாள்.

மெயின் கேரக்டர்கள்:

இரண்டு பெண் கேரக்டர்கள் பயணிக்கிறார்கள். அதில் ஒருவர் தொலைந்து போகிறார். இரண்டு படங்களிலுமே இது உண்டு. ஹிட்ச்காக் படத்தில் இரண்டாவது கேரக்டர், ஒரு வயதான பாட்டி. இதில் ஹீரோயினின் குழந்தை. காணாமல் போனது யாரோ ஒரு லேடி என்பதைவிட, தன் குழந்தை எனும்போது ஹீரோயின் கேரக்டருடனும் கவலையுடனும் Flightplan-ல் நாம் நன்றாக இன்வால்வ் ஆகமுடிகிறது. ஹிட்ச்காக் படத்தை பாப்கார்ன் கொறித்துக்கொண்டே பார்த்துவிட முடியும்.

சஸ்பென்ஸ்:
மெயின் கேரக்டர் சொல்வதை யாரும் நம்புவதில்லை. நமக்கு உண்மை தெரியும். அதனால் சஸ்பென்ஸ் எகிறுகிறது. இரண்டு படத்திலும் இது சிறப்பாக கையாளப்பட்டிருக்கும். ஹிட்ச்காக் படத்தில் ஹீரோ கேரக்டர் மட்டும் ஹீரோயினை நம்புவார். Flightplan-ல் யாரும் நம்புவதில்லை, நமக்குத் தெரியாத அந்த வில்லன் கும்பலைத் தவிர!

சைக்காலஜி:

ஹிட்ச்காக் படத்தில், லேடியைக் கொல்ல முயலும்போது ஹீரோயினுக்கு தலையில் அடிபடும். ’அதனால் தான் யாரோ ஒரு லேடி உடன் வந்ததாக ஹீரோயின் நினைக்கிறார்’ என்று எல்லோரும் சொல்வார்கள். ஹீரோயினுக்கே ஒரு ஸ்டேஜில் தன்மீது சந்தேகம் வந்துவிடும்.

Flightplan-ல் அதே கதை தான். வில்லன்கள் ஹீரோயினின் புருசனைக் கொன்றுவிடுகிறார்கள். அந்த அதிர்ச்சியில் இருக்கும் ஹீரோயின்னு, சைக்காலஜிக்கலாக பிரச்சினை இருக்கிறது. அதனால்தான் உடன் குழந்தை வந்ததாக நினைக்கிறார் என்று எல்லோரும் சொல்வார்கள். ஹீரோயினும் ஒரு நிமிடம் அதை நம்ப ஆரம்பித்துவிடுவார்.

வில்லன்களால் ஹீரோயினுக்கு உண்டாக்கப்பட்ட சைக்காலஜிக்கல் பிராப்ளம் என்பது இரண்டு படத்திலும் மெயிண்டெய்ன் ஆகிறது!


ஹீரோ:
ஹிட்ச்காக் படத்தில் ஹீரோ ஹீரோயினை நம்புவார். Flightplan-ல் ஹீரோ நம்புவதில்லை. ஆனாலும் கடமை காரணமாக உதவ முன்வருகிறார். 

சைக்காலஜி டாக்டர்:

இரண்டு படத்திலுமே ஒரு சைக்காலஜி டாக்டர் கேரக்டர் வருகிறது. வந்து, ஹீரோயின் நினைப்பது வெறும் மாயையே என்று ஹீரோயினை நம்ப வைக்கிறது.

அரசியல்:

ஹிட்ச்காக் படம் வந்தபோது, உலகநாடுகள் இரண்டாம் உலகப்போருக்கு ஆயத்தமாகிக் கொண்டிருந்தன. ஜெர்மனியை வில்லனாக ஹிட்ச்காக் படம் குறிக்கும்.

11-செப்டம்பர் 2001 நிகழ்வுக்குப் பிறகு விமானப் பயணம் என்பதே ஆபத்தானதாக கருதப்பட்டது. முஸ்லிம் தீவிரவாதத்திற்கு எதிரான போர் முடுக்கிவிடப்பட்டது. எனவே சந்தேகத்திற்கு இடமான இரண்டு அரபு கேரக்டர்கள் Flightplan-ல் வரும்.


பெட்டி:

வில்லனின் கையாள்களான ஒரு மேஜிக் குழு ஹிட்ச்காக் படத்தில் பயணம் செய்யும். ஒரு மேஜிஷியனை ஹீரோ அடித்து, மேஜிக் பெட்டியில் அடைத்துவைப்பார். அதன்மேல் உட்கார்ந்து ஹீரோவும், ஹீரோயினும் பேசுவார்கள். ஒரு சவப்பெட்டி மேல் உட்கார்ந்திருப்பது போல்  தோன்றும்.

Flightplan-ல் சவப்பெட்டிக்கு முக்கிய இடம் உண்டு. வில்லன் & ஹீரோயின் சந்திப்பு, அதை மையமாக வைத்தே நடக்கும்.

லேடி/குழந்தை:

ஹிட்ச்காக் படத்தில் வரும் லேடி, அப்பாவி போல் தெரிந்தாலும் அவரிடம் ஒரு சீக்ரெட் இருக்கும். அவர் அப்பாவி அல்ல.

Flightplan-ல் குழந்தை ஒரு அப்பாவி. குழந்தை சம்பந்தப்பட்ட ஒரு பொருளில் தான் சீக்ரெட் இருக்கிறது.

லாஜிக் & MacGuffin:

ஹிட்ச்காக் படத்தில் வரும் MacGuffin லாஜிக்குடன் இருக்கும்.

Flightplan சறுக்கியது இங்கே தான். வில்லன் யார், அவர்களின் திட்டம் என்ன என்று நமக்குப் புரியும்போது லாஜிக் அடிவாங்குகிறது.  வில்லன்களின் திட்டத்தில் ஏகப்பட்ட ஓட்டைகள். குருட்டு அதிர்ஷ்டத்தில் தான் அந்தத் திட்டம் வெற்றிபெற முடியும். (ஆனாலும் அதைப் பெரிதுபடுத்தாமல் படத்தை ரசிக்க முடிகிறது.)

ஹிட்ச்காக் படத்தில் லேடி பயணிப்பதை  சிலர் பார்த்திருப்பார்கள். ஆனாலும் சொந்தப்பிரச்சினை காரணமாக சொல்லத்தயங்குவார்கள். உதாரணம், ஒரு லாயர் தன் வைப்பாட்டியுடன்/கள்ளக்காதலியுடன் பயணம் செய்வார். எனவே இதில் இன்வால்வ் ஆவது தனக்குச் சிக்கல் என ஒதுங்கிக்கொள்வார்...அது லாஜிக்!

Flightplan-ல் யாருமே அந்தக் குழந்தையைப் பார்க்கவில்லை என்று வருகிறது. கிளைமாக்ஸில் ஒரு பையன் மட்டும் ‘நான் சொன்னேன்ல’ என்று ஒரு டயலாக். ஏர்போர்ட் சிசிடிவி, ஃப்ளைட்டில் ஏறும்போது கிழிக்கப்படும் கேட்பாஸின் ஒரு பகுதி என பல சாட்சிகள் இருந்தும், திரைக்கதையில் அதைக் கண்டுகொள்ளாமல் கதைவிட்டிருப்பார்கள்.

நேரடித் தொடர்பு:


ஹிட்ச்காக் படத்தில் வரும் லேடி ஃப்ராய், தன் பெயரை ட்ரெய்ன் விண்டோ கண்ணாடியில் எழுதுவார். காணாமல் போனபின், அவர் பயணம் செய்தார் என்று குழம்பிய ஹீரோயின் மீண்டும் நம்ப, அது உதவும்.

Flightplan-ல் அந்த சீன் அப்படியே சுடப்பட்டிருக்கிறது. ஒரு நல்ல ஆத்மா யூ-டியூப்பில் அந்த சீன்களை எடுத்துப் போட்டிருக்கிறார். அது இங்கே:



ஹாலிவுட் படங்களில் ‘Hitchcockian Movies' என்றே ஒரு ஜெனர் உண்டு. Mission Impossible, Jamesbond Movies, The Fugitive என பல படங்கள் இந்த ஜெனரில் வந்திருக்கின்றன. அவையெல்லாமே ஹிட்ச்காக்கின் திரைக்கதை மற்றும் விஷுவல் ட்ரீட்மெண்டை அடிப்படையாகக் கொண்டு உருவானவை. 

இந்த மாதிரிப் படங்களைப் பற்றி அவ்வப்போது எழுதி, வெள்ளையா இருக்கிறவன் காப்பி அடிக்க மாட்டான் என்று நம்புகிறவர்களுக்கு வேப்பிலை அடிக்கலாமா என்று யோசிக்கிறேன். :)

மேலும் வாசிக்க... "ஹிட்ச்காக் படத்தைச் சுடுவது எப்படி? - Flightplan(2005)"
மறுமொழிப்பெட்டி:
தமிழிலும் மறுமொழியிடலாம்
Loading...

2 comments:

Post a Comment

தங்கள் பின்னூட்டத்திற்கு நன்றி.

Saturday, June 27, 2015

திரைக்கதை சூத்திரங்கள் – CONTENTS


PART I - திரைக்கதை அடிப்படைகள்



























PART-II - பீட் ஷீட்

















41. Rasa Theory 

 PART III - ஜெனர்




45. ஜெனர் – சாகசம் (Adventures)
46. ஜெனர் - கேங்ஸ்டர் (Gangster)
 47. ஜெனர் – Film Noir & Neo-Noir 
48.  Film Noir & Neo-Noir -2 
49. ஜெனர் – திகில் படங்கள் (Horror) 
50. ஜெனர் – திகில் படங்கள்-2 
51. ஜெனர் – மாயக் கதைகள் (Fantasy) 
52. ஜெனர் – அறிவியல் புனைவுகள் 
53. ஜெனர் - குற்றம் & மர்மம்  
54. ஜெனர் - மெலோடிராமா 
55. ஜெனர் - காதல் 
56. ஜெனர் - காதல்..இன்னும் கொஞ்சம்!

68. ஜெனர் - நகைச்சுவைப் படங்கள்
69. ஜெனர் - ஃபேமிலி / செண்டிமெண்ட்  



PART IV - திரைக்கதை ‘எழுதுவது’ எப்படி? 

57. ஐடியா / கரு - நோட் பண்ணுங்கப்பா, நோட் பண்ணுங்கப்பா!  
58. திரைக்கதைக்காக ஒரு கதை 
59. திரைக்கதை எழுதாமல் இருப்பது எப்படி?

60.  BeatIt..Beat It. 
61.  எட்டு, எட்டா திரைக்கதையைப் பிரிச்சுக்கோ!  
62. சீன் போர்டுடன் சீன் போடுங்கள்
63. திரைக்கதை எழுதும் நேரம் 
64.  SCENE FORMAT - இன்னும்கொஞ்சம்..

65.  மாற்றம்...முன்னேற்றம்...வளர்ச்சி
66. திரும்பத் திரும்பப் பார்த்துப் பார்த்து.... 
70. வரி..வட்டி..கிஸ்தி!
71. திரைக்கதை எழுதிய பின்...! 
72. திரைக்கதை சூத்திரங்கள் - முடிவுரை

மேலும் வாசிக்க... "திரைக்கதை சூத்திரங்கள் – CONTENTS"
மறுமொழிப்பெட்டி:
தமிழிலும் மறுமொழியிடலாம்
Loading...

4 comments:

Post a Comment

தங்கள் பின்னூட்டத்திற்கு நன்றி.