எனக்குப் பிடித்த கமலஹாசனும், டாப் 5 படங்களும்

சென்ற தலைமுறையில் எம்.ஜி.ஆர் - சிவாஜி என்ற இரு ஜாம்பவான்கள் சினிமாத் துறையில் கலக்கிக்கொண்டிருந்தார்கள். எம்.ஜி.ஆர் எப்போதும் டெக்னிகல் விஷயங்களில் அதீத ஆர்வம் கொண்டவர். படங்களுக்கு திரைக்கதை எழுதுவது, இயக்குவது, புதிய விஷயங்களை சோதித்துப் பார்ப்பது என்று எம்.ஜி.ஆர் பல துறைகளில் சாதித்துக்கொண்டிருக்கிறார். இன்னொரு புறம் சிவாஜி கணேசன், நடிப்பில் பல புதிய பரிணாமங்களைத் தொட்டுக்கொண்டிருந்தார். வித்தியாசமான கதைக்களன்கள், பலவித உணர்ச்சிகளை வெளிப்படுத்தும் வேடங்கள் என்று சிவாஜி தனக்கான தளத்தை அமைத்துக்கொண்டார்.

அதற்கடுத்த தலைமுறை நடிகர்கள் உருவாகி வந்தபோது, எம்.ஜி.ஆர்-சிவாஜி இருவரின் செல்லப்பிள்ளையாக கமலஹாசன் இருந்தார். அதனால்தானோ என்னவோ, இருவரின் திறமைகளும் ஒருங்கே அமையப் பெற்றவராக கமல் உருவானார். எம்.ஜி.ஆர் போன்றே டெக்னிகல் விஷயங்களில் ஆர்வம், சிவாஜி போன்று நடிப்பில் வித்தியாசமான முயற்சிகள் என்று ஆச்சரியமூட்டும் நடிகராக ஆனார் கமலஹாசன்.

பொதுவாக சினிமாவில் சம்பாதித்த பணத்தை சினிமாவில் முதலீடு செய்யக்கூடாது என்பது சினிமா பாலபாடம். ஆனால் தன் கலைத் தாகத்தால், தன் சம்பாத்தியம் அனைத்தையும் சினிமாவுக்கே தாரை வார்த்தவர் கமல். அதனால் தனிப்பட்ட வாழ்க்கையில் அவர் சந்தித்த பிரச்சினைகளும் இழப்புகளும் ஏராளம். ஆனாலும் தனது தயாரிப்பு நிறுவனத்தின் மூலம், தமிழ் சினிமாவின் முக்கியப் படங்களைத் தந்தவர் கமலஹாசன்.

கமலின் சினிமாக்களின் அடிப்படையாக இருப்பது, தமிழ் சினிமாவை தொழில்நுட்பரீதியில் அடுத்த கட்டத்திற்கு நகர்த்துவது. கிராஃபிக்ஸ் தொழில்நுட்பம் வளராத காலகட்டத்திலேயே விக்ரம் போன்ற படங்களில் பல பரிசோதனை முயற்சிகளை முயன்று பார்த்தவர் கமலஹாசன். 

அவரது படங்களில் என் மனதைக் கவர்ந்த படங்களாக 5 படங்களைச் சொல்லலாம் :

1. பதினாறு வயதினிலே :

பெண்களின் கனவுக் கண்ணனாக அவர் இருந்த காலகட்டத்தில், கதை மேல் உள்ள நம்பிக்கையிலும், புதிய முயற்சிகளின் மேல் உள்ள ஆர்வத்திலும் அவர் சப்பாணி வேடத்தில் நடித்தார். இன்றளவும் தமிழ்சினிமாவை தலைகீழாகப் புரட்டிப்போட்ட படம் என்ற பெருமை இப்படத்திற்கு உண்டு.

2. சிகப்பு ரோஜாக்கள் :

நெகடிவ் ரோலில் கமல் கலக்கிய படம். தமிழில் ‘சைக்கோ’ போன்று வெளிவந்த படம். பெண்களைக் கவர்வதும், கொல்வதுமாக ஒரு முண்ணணி ஹீரோ செய்யக்கூடாத வேலையெல்லாம் செய்த படம். கமலின் நிதானமான, அழுத்தமான நடிப்பிற்கு ஒரு உதாரணம் இந்தப் படம்.

3. நாயகன் :

வேலு நாயக்கர் என்ற பாத்திரமாகவே கமல் வாழ்ந்த படம். இளம்வயது ஆளாக இருந்து, படிப்படியாக வயதானவராக கமல் மாறும்போது, உண்மையிலேயே அவருக்கு வயதாகிறதோ என்று எண்ண வைத்த படம். ஒவ்வொரு வயதிற்கும் ஏற்ற மாதிரி, கெட்டப்பையும், பேச்சையும் மாற்றிக் காட்டி, கமல் நடிப்பின் உச்சத்தைத் தொட்ட படம்.

4. தேவர் மகன் :

தமிழில் வந்த கிராமப் படங்களில், அந்த கிராமத்து மக்களின் பிரச்சினையை யதார்த்தமாகச் சொன்ன படம். ஒரு கிராமத்தில் இருந்து படித்து வெளியேறுபவன் சந்திக்கும் மனப்போராட்டங்களை தெளிவாகச் சொன்ன படம். கமல் சிறந்த கதை-வசனகர்த்தாவாக உருவான படம் என்பதாலும் இதை எனக்கு ரொம்பவே பிடிக்கும்.

5. அன்பே சிவம் :

நடிப்பில் கஷ்டமான விஷயம் நகைச்சுவை தான். அவ்வை சண்முகி, தெனாலி போன்ற படங்களில் நகைச்சுவை நடிப்பிலும் தேர்ந்தவராக கமல் தன்னை நிரூபித்திருந்தாலும், அன்பே சிவம் படம் முழுக்க வந்த மெல்லிய நகைச்சுவை என்னைக் கவர்ந்த ஒன்று. விபத்திற்கு முன்பும், பின்பும் கமல் தன் மேனரிசங்களில் காட்டிய வித்தியாசம், நுணுக்கமான நடிப்பிற்கு உதாரணம். மேலும் படம் சொன்ன செய்தியும் என்னைக் கவர்ந்த படங்களில் ஒன்றாக இதை ஆக்கியது.

தொடர்ந்து தேடலுடன் படம் செய்து வரும் உலகநாயகன் கமலஹாசனின் 57வது பிறந்த நாள் இன்று(நவம்பர் ஏழு). அவர் பல்லாண்டு வாழவும், தொடர்ந்து பல நல்ல படங்களை நமக்குத் தரவும் ஆண்டவன் அருள் புரியட்டும்.