INCEPTION - சுட்ட படமா? கஜினி சுட்ட படமா?

டிஸ்கி: கொஞ்ச நாளாவே ரொம்ப சீரியஸா எழுதுற மாதிரி தோணுச்சு.(நாங்க சீரியஸா எடுத்துக்கலயே!)..அதான் இந்தக் காமெடிப் பதிவு...

கொஞ்ச நாளைக்கு முன்னாடி..இன்ஸெப்சன்.. இன்ஸெப்சன்..என்று பதிவுலகமே அல்லோகப்பட்டது..’கிறிஸ்டோபர் நோலன் மாதிரி வருமா’என எல்லோரும் புளகாங்கிதம் அடைந்தனர். என்னைப் பார்க்கும் நண்பர்களும் ‘இன்னும் பார்க்கலையா’ என்று கேட்டு விட்டு, ஏதோ வேற்றுகிரகவாசியைப் பார்ப்பதுபோல் பார்த்தனர்..இனியும் பொறுத்தால் ‘பதிவு விலக்கம்’ செய்யப் படுவோமோ எனப் பயந்துபோய், டிவிடி-யை தேடி வாங்கி இன்செப்சனைப் பார்த்தேன். புதிய கான்செப்ட் என்று சொன்னார்களேன்னு பார்த்தால், இது அப்பட்டமான காப்பி என்பது புரிந்து ’அப்படியே ஷாக்’ ஆயிட்டேன்..’எப்படியே’ன்னு சொல்றேன்..கேளுங்க..

 புரட்சித்தலைவர் நடித்த எங்க வீட்டுப்பிள்ளை படத்தில் சரோஜா தேவியுடன் தலைவர் ஒரு ஷூட்டிங்கை வேடிக்கை பார்ப்பார். அப்போது தலைவர்ஒரு கனவு காண்பார்..’குமரிப் பெண்ணின் உள்ளத்திலே’ என்று பாட ஆரம்பிப்பார்..அப்போது சரோஜா தேவி தலைவரின் கனவிற்குள் நுழைந்து’ஆ..ஆ..ஆ...குமரிப் பெண்ணின்’ என்று தொடர்வார்..

அதாவது ஒருத்தரோட கனவுக்குள் இன்னொருவர் நுழையறதுங்கிற கான்செப்ட்ட அப்போதே நம்ம ஆட்கள் கண்டுபிடிச்சுட்டாங்க..இது மாதிரி நிறைய படங்கள்ள ஒருத்தர் கனவில் இன்னொருத்தர் நுழைஞ்சதெல்லாம் இப்போ ஞாபகம் வருதா... 

ஓ.கே..இப்போ Projections..அது எங்கேன்னு நீங்க கேட்கலாம்..ஹீரொ-ஹீரொயின் பின்னாடி ‘லா..லா..’ன்னு ஓடி வரும் ஆரவாரப் பேய்களெல்லாம் யாரு?..அதாங்க  Projections..

சரி..ஒருத்தர் கனவுக்குள்ளே இன்னொருத்தரும் Projections-ம் வந்தாச்சு ஓ.கே..ஆனா Inception-ஐ அதாவது விதைக்கறது எங்கேன்னு நீங்க கேட்கலாம்..விஜயோட ‘ வேட்டைக்காரன்’ பார்த்திருப்பீங்க (அட, கூச்சப்படாம ஒத்துக்கோங்ணா!)..அதுல ட்ரெய்ன்ல அனுஷ்காவைப் பார்த்ததும் கல்யாணம் ஆகுறமாதிரியும் குழந்தைங்க பிறக்கிறமாதிரியும் விஜய் கனவு காண்பார்..ஒரு கனவுல ‘குழந்தையையே’ விதைக்க முடிஞ்ச நம்ம ஆட்களால ஒரு கனவுல ஐடியாவை விதைக்க முடியாதா?

ஆத்தீ..கண்டுபிடிச்சுட்டாருய்யா!

Inception படம் பார்த்தப்போ தான் ஒரு பயங்கரமான சினிமா ரகசியம் ஒண்ணை கண்டுபுடிச்சேன்..இத்தனை நாளா நோலனோட ‘Memento’ படத்தை சுட்டுத்தான் நம்ம ஏ.ஆர்.முருகதாஸ் ’கஜினி’ படம் எடுத்ததா நினைத்துக்கொண்டிருந்தோம்..அதுதான் இல்லை..1975லேயே(!) முருகதாஸ் கஜினி கான்செப்ட்டை ரெடி பண்ணீட்டாரு..இதை எப்படியோ தெரிஞ்சுக்கிட்ட நோலன், முருகதாஸோட கனவுல புகுந்து அந்த கான்செப்ட்டை சுட்டுட்டாரு..இதுபுரியாம அந்த தங்கத்தை நாம எல்லாம் தப்பா நினைச்சிட்டோம்.அதுக்காக உங்க எல்லார் சார்பாவும் முருகதாஸ்கிட்ட நான் மன்னிப்பு கேட்டுக்கிறேன்..முருகதாஸ்க்கு மட்டும்தான் இந்த அநியாயம் நடந்திருக்கா, இல்லே ஷங்கர், மணிரத்னம், கமல் போன்ற ஹாலிவுட் ரேஞ்சுக்கு படம் எடுக்கும் எல்லோருக்கும் நடந்திருக்கான்னு நம்ம சி.பி.ஐ விசாரிக்கணும்.

இனிமே இதுபோல நடக்காம இருக்கணும்னா, நம்மூர் டைரக்டர்ஸ் எல்லாரும் தூங்கும்போது 2 பாடிகார்டை பக்கத்துல நிறுத்தி வச்சுக்கணும்..நோலன் கனவுக்குள்ளே நுழையற மாதிரி தெரிஞ்சதுன்னா, ஒரே மிதி..அதாவது Kick..யாருக்கா நம்ம ஆட்களுக்குத்தான்..கனவு கலைஞ்சிடும்.

என்னது..என் கனவுல வந்தது அசின் இல்லையா?

ஓ.கே...பேக் டூ இன்ஸெப்சன்..நோலனால கனவு காண்பவர் இல்லாம கனவு காண முடியலை. அதுலயும் நம்ம ஆட்கள் அவரை பீட் பண்ணீட்டாங்க..’ஏய் நீ ரொம்ப அழகாயிருக்கே’-ங்கிற படத்துல ஒரு சீன்..ஹீரோ ஷாம்-ன் அம்மா ஒரு கனவு காண்பாங்க..அந்த கனவுல சினேகா குளிச்சுக்கிட்டிருப்பாங்க..அதை ஷாம் எட்டிப் பார்ப்பாரு(!!)..உடனே பாட்டு ஆரம்பிக்கும் ‘ஒரு காதல் வந்துச்சோ’ன்னு..ஷாமோட அம்மா அந்த கனவுல வரவே மாட்டாங்க..முடியுமா..நோலனால… முடியுமா இப்படி கனவு காண..இப்படி படம் எடுக்கத்தான் முடியுமா? இன்ஸெப்சன்ல ஒன்னுக்கு(யூரின் இல்லீங்க) ரெண்டு ஹீரோயின் இருந்தும் இப்படி சீன் வைக்கத் தோணுச்சா அந்தாளுக்கு?

ஆக, தமிழனின் கான்செப்ட்டை வச்சு படம் எடுத்து, தமிழன்கிட்டயே பாராட்டு வாங்கிறார்னா அந்த வெள்ளைக்கார தொரைக்கு எவ்வளவு தகிரியம் இருக்கனும்..இதை தமிழ்ப்பதிவர்களாகிய நாமெல்லாம் கண்டிக்க வேண்டாமா?...ஆங்கில மோகத்தில் அடிமைப்பட்டுக் கிடக்கலாமா?..ஏன் இதைக் கண்டிச்சு யாரும் எழுதவில்லை? நோலனை நோண்டி நொங்கு எடுத்திருக்க வேண்டாமா?

ரொம்ப கோவம் கோவமா வர்றதால இத்தோட நான் நிறுத்திக்கிறேன்..இனி நீங்க கண்டினியூ பண்ணுங்க!