சிம்மக் குரலோன் சிவாஜி கணேசன்

நடிகர் திலகத்தின் நடிப்பைப் பற்றி எழுதுவதென்பது சூரியன் ஒளிமிக்கது என்று விளக்குவது போன்ற வேலை தான். ஏனென்றால் நடிப்பின் எல்லா எல்லைகளையும் தொட்ட பிதாமகன் அவர் என்பது எல்லாருமே அறிந்த விஷயம்.

வீரபாண்டியக் கட்டபொம்மன், கர்ணன், பாசமலர் போன்ற படங்களின் மூலம் உணர்ச்சிமிகு நடிப்புக்கான இலக்கணத்தையும், நிறைகுடம், சாந்தி, புதிய பறவை, முதல் மரியாதை, தேவர் மகன் போன்ற படங்களின் மூலம் இயல்பு நடிப்புக்கான இலக்கணத்தையும் படைத்தவர் அவர்.

எனவே அவரது நடிப்பு பற்றி சிலாகிப்பதை விடுத்து, அவரது பொதுவான பண்பு பற்றி பார்ப்போம் இன்று. பலரும் சிவாஜியிடம் கவனிக்காத விஷயம் அவரது ஸ்டைல். சூப்பர் ஸ்டார் ரஜினிகாந்த் ஒரு பேட்டியில் ‘நான் ஸ்டைல் மன்னன் என்றால் அவர் ஸ்டைல் சக்கரவர்த்தி. அவரது படங்களைப் பார்த்தே ஸ்டைல் பண்ணக் கற்றுக்கொண்டேன்’ என்று சொன்னார். திருவளர்ச்செல்வரில் ‘மன்னவன் வந்தானடி’ பாடலின் ஆரம்பத்தில் அவர் நடக்கும் நடை அவரது ஸ்டைலுக்கு உதாரணம். புதிய பறவை, வசந்த மாளிகையிலும் ஸ்டைலில் கலக்கியிருப்பார்.

பொதுவாகவே ஒரு துறையில் சிறந்து விளங்குவோர், வேறு யாரும் தன்னை விட நல்ல பெயர் எடுத்துவிடக்கூடாது என்பதில் குறியாக இருப்பர். ஆனால் அதிலும் சிவாஜி வித்தியாசமானவராய் இருந்தார். அவரை விட யாராவது நன்றாக நடித்தால் மனம் திறந்து பாராட்டுவதும், அவரை அமுக்க முயலாமல் ஊக்குவிப்பதும் அவர் வழக்கம். திருவிளையாடல் ஷூட்டிங்கில் நாகேஷ்இன் காட்சிகள் படமாக்கப்பட்டபோது, ‘நாகேஷின் ஒரு வசனத்தைக்கூட கட் செய்யக்கூடாது’ என்று டைரக்டரிடம் சொன்னவர் சிவாஜி. இன்றளவும் நாகேஷின் பெயர் சொல்லும் படமாக திருவிளையாடல் திகழ்கிறது.

இப்போதெல்லாம் படத்தில் ஹீரோக்கள் மட்டுமே தெரிகிறார்கள், அவர்களை மையப்படுத்தியே காட்சிகள் நகர்கின்றன. இந்தச் சூழ்நிலையோடு, சிவாஜியின் பண்பை ஒப்பிட்டால், அவர் ஏன் இன்றும் சக நடிகர்களாலேயே போற்றப்படுகிறார் என்பது புரியும்.

சாதனையாளர்கள் பலரும் தவறி விழுவது பிள்ளைப் பாசத்தால் தான். ஆனால் அதிலும் சிவாஜி நடிப்பின் மீது அவருக்கிருந்த மரியாதையை நிரூபித்தார். தனது கலையுலக வாரிசாக கமலஹாசனையே அவர் அறிவித்தார். தன் மகன் என்பதற்காக அவர் பிரபுவை தன் வாரிசாக மக்களிடம் திணிக்கவில்லை. 

பிரபு ஒரு சமயம் ‘நான் எப்படி நடிக்கின்றேன்?” என்று கேட்டபோது “முதல்ல நீ தமிழை ஒழுங்காப் பேசு. அப்புறமா நடிக்கிறதைப் பத்திப் பார்க்கலாம்” என்று சொன்னவர் அவர். திறமையின் அடிப்படையில் கமலையே வாரிசாக ஏற்றுக்கொண்டார். அவரது நேர்மைக்குச் சான்றாகவும் அது அமைந்தது. 

தொழில் பக்தியிலும் அவரை மிஞ்ச ஆளில்லை. காலையில் 8 மணிக்கு ஷூட்டிங் என்றால் 7 மணிக்கே ஸ்பாட்டிற்கு வந்து மேக்கப் போட்டு, உட்கார்ந்துவிடுவார். அதே போன்று ஞாயிற்றுக்கிழமை குடும்பத்திற்கானது என்ற நடைமுறையை நடிகர்கள் மத்தியில் கொண்டு வந்தவரும் அவர் தான்.

தொழில்நுட்பம் எவ்வளவோ வளர்ந்துவிட்ட இந்த நிலையிலும், ஓவ்வொரு கேரக்டருக்கும் இடையில் அவர் காட்டிய வித்தியாசம் இன்றும் பிரமிப்பூட்டுவதாக உள்ளது.

அரசியலில் இறங்கி கடும் தோல்வியை அவர் சந்தித்தபோது, மாபெரும் சாதனையாளரான அவர் நம் மக்களால் மதிக்கப்படவில்லையோ என்ற எண்ணம் உருவானது. ஆனால் அவரது இறுதி ஊர்வலத்தில் பல லட்சக்கணக்கான மக்கள் கலந்துகொண்டு, ஒரு நடிகராக, நடிகர் திலகமாக அவர் மக்கள் மனதில் உயர்ந்த இடத்தைப் பிடித்துள்ளார் என்பதை நிரூபித்தார்கள். 

அவரது நடிப்பில் குறிப்பிடத்தக்க பாடல்களாக இரண்டை நான் குறிப்பிட விரும்புகிறேன். முதலாவது ’சாந்தி’ படத்தில் வந்த கிளாசிக் பாடலான ‘யார் அந்த நிலவு’. பாடல் பற்றி மேலும் விபரம் அறிய இங்கே!

இரண்டாவது ‘ஞான ஒளி’யில் வந்த ‘தேவனே என்னைப் பாருங்கள்’ பாடல். இந்த இரண்டு பாடல்களுமே இசையமைப்பாளர்-கவிஞர்-பாடகர்-நடிகர் ஆகியோர் தங்கள் உச்சத்தைத் தொட்ட பாடல்கள் என்பதாலேயே எனக்குப் பிடிக்கும்.

ஒரு தமிழ் நடிகனாகப் பிறந்து நமக்கெல்லாம் பெருமை தேடித் தந்த கலைஞனை என்றும் பெருமிதத்துடன் நினைவு கொள்வோம்.

அக்டோபர் 1, நடிகர் திலகம் சிவாஜி கணேசனின் பிறந்த நாள்!